New Testament Baptist Churches Association Tanchin Tomkim
By ~ Rev. K. Hangnung
Thumapui
Ataangpi in Manipur gamsunga singtaangmi tuamtuam umte leh a diahkholin Simte namte a biihtahin a tuama um leh kum tampi mial nuaiah Pathian hutdamna helouin ina khosa uhi. British mi James Winchester Lushai mite'n a thah nungva Mary Winchester Lushai namte'n a puimang nungun Britishte'n lushai taanga ana um tua Mizoram kichita leh a kimveela umte diingin tulai khangthua adiingin etdaan thah ahung peta uhi. Hitobang khangthu ana um jiahin Manipur Simgam a umte jousiah chu polam mite heetphaah diinga taahlat i hung suahta uhi. Manipur gam neutakhat chu chu India gam sunga um Nagaland, Myanmar, Mizoram leh Assam gamin Maallam, suahlam leh Tumlam gamte'n aumkiimveel uh ahi hi. A gam letdaan chu 22, 327 sq. km. ahi a, hute lah ah 90% veel chu gammaang in a tuamkhum ahi a, hubaan ah nam tuamtuam 30 veel bang akikhosa khawm hi. Kumzabi 20 lah veelin Senvon khua neuta khat ah Tanchinpha ahung kisoi masapeen a, huchu Manipur simlama umte tawmtakhat in hi tanchinpha chu ana gingta uhi. Hulai akipat tanchinpha ana kisoita ahihjiahin Manipur gama singtaang mi umte jousiah chu Khristian ahung kisuahvehta hi.
Simte mite chu Manipur Simlam taangah ana kiumkhawm a, hulaia i pulepate uh chu lutang kilate leh mawltaha khosate ahi uhi. Khovel polama bang um ahiai chih helou khop in ana mawl uhi. Simte tate'n hi gindaan thah chu ana gingta pah sihva, ajiahchu sabiahna lama ana ginumbeeh taah jiahun ahi. Huchiang leh Simte khuate chu hoihtaha Hausate thuneihna nuaia etkol ana hita uhi. Simte khua a hausa umte'n hi gindaan thah ana pom ut sihva, hukhu in Christian sahkhua khantouhna diing hunsawttah ana daal hi. Himahleh Pathian hehpihna jaalin Simte Society sungah kihenna hung umin kum1940 lahveelin Khristian sahkhuain khantouhlam ahung manoh hiaihiaita hi. Huchiin Simte mite hunkhopin hi gindaan thah chu ahung pomta uhi. Huchiin kum 1950 in gingtu honkhat hung paikhawmin kipawlkhawmna khat Simte Khristian Association ahung siamdohta uhi. Hih pawl hung kiphutdoh Simte Christian Association ana kichi chu vaah hung poluuttu ahung suahta a, hunungin hi pawl chu New Testament Baptist Churches Association (NTBCA) chihin ahung umdohta hi. Simte Christian Association (SCA) leh a na kizoppih Baptist Mid. Mission (Assam-India) Khovela kidoupi nihna aum lai velin Simte mite lahah gingtu kichi mi ana tawm mahmah nalai hi.
Tanchinpha in ana piching jaw deuhte ana heng zoupah sih jong leh khangthahte peen nasatah meia kihongin Lalpa Jesu Khrist chu Lal leh Hundampa diingin hung pomtat uhi. Kum 1935 lahveelin kipawlkhawmna neutakhat Thanlon khua ah (Hulaiin Simte khua umte laha lianpeen ahi). Hi kipawlkhawmna a member umte'n gingloute laha a ginna uh hung soidoh jeelin awlawlin member diing mi ahung tam hiaihiaita uhi. Huchiin khovel kidoupi nihna beikuan lamah chu nasatah in Simte tate umna khosuan chinah ahung kithehdalhta hi. Huleh hi Khristian hung kiloikhawmte chu Mongon khua ah ahung kimukhawmta va, hutah ah March 22, 1951 kumin Simte Khristian Association kichi ahung bawldohta uhi. Simte Christian Association lamkaite chu kum chinin khotuam tuam ah ahung kimukhawm jeel uhi. Simte namte laha Tanchinpha phuandoh ahihtheihna diingin nasatahin pan alakhawm uhi. Huchiin Pathian hehpihna jaalin kouhtuamte chu awlawlin ahung khanglian hiaihiaita uhi.
Simte sunga gingtu masa umte'n Biblical mission Agency khat toh kizopkhawmna neih diing hulai in ana lunggulh mahmah uhi. Hukhu lungsima neikawmin Henjamang Thangsing, Berry White Medical School a Damdawi zila um chu Mission agency khat hawl diinga ngansiah in ahung umta hi. Ama'n kum 1947 August ha in K.A. Koireng Singh, Meeitei Evangelist khat ahung kimuhpih a, ama'n ana kawhmuh bangin a khonung lamin Alipur ah Tuipi gaala kipan a hung pai Saapte ava kimuhpih diingin avakuanta hi. Pivangtaha kithuhilhna ngaikhia jouin Cachar lama um Rev. James S. Garlow ava kimuhpihta hi. Rev. James S. Garlow, Superintendent, Baptist Mid-Missions, Assam. in kipaahtahin hi Simte tangvaal (L) Henjamang Thangsing chu ana kimuhpih in haamteina ana neihpih hi. Anihva houlimna tomkhat aneih nungun Lalpa grape huana na seem khawm diingin lem ahung sata uhi. Huzouin Henjamang Thangsing jong lungtanga kipaahna thupitah toh a teenna khua uh Thanlon ahung kilehkiitta hi. Huin ama'n Simte sunga gingtu tamlou khat umte kawmah Baptist Mid Mission in eiuh a diing kot lianpi hong ahihdaan report ahung peta hi. Hi thu kipaah umtah jiahin Simte sunga gingtu umte diingin kinepna thah ahung pia a, etdaan thah hung pia in, nasatahin ahung haamteitava, a hinkhuava silthah a luut diingin ahung haamteita uhi. Lalpa'n a mite haamteina hung ngaihkhiahsahin Rev James S.Garlow leh (L) Henjamang hamteikhawm nung kum 10 zohin Rev. James S. Garlow in Manipur a Simte tate vehna ahung neita hi. Baptist Mid. Missionte'n Simte Khristiante ahung vehdaan hi anuaia bang ahi.
Kum 1957 in Rev. James S. Garlow in Tonja Singh hung kitonpih in Tangnuam leh Dumsau khua hung vehin hutah ah Baptisma mi 50 in ana tangtheita uhi.
1.1957 kum mah in Rev. James S. Garlow leh Rev. Walken in Thanlon ahung pha uhi.
2.Kum 1958 (January) in Rev. James S. Garlow leh Rev. Walken in Thanlon, Joutung leh Suangpeehmun ahung vehkiit uhi.
3. Kum 1958 February ha in Rev. Walken leh Rev. Chunglen Kamei in Pamjaal khua hung pha in hutah ah Baptisma mi 40 abawl baanvah Fundamental Baptist Kouhtuam thah khat ahung dinkheta uhi.
4.Hubaan ah March/April of 1958 kum in Rev. & Mrs. James S. Garlow toh a zi in Dumsau khua ahung veh kiit uhi.
Kum 1957 leh 1958 kikaala BMM Missionaryte'n Simte Khristian kouhtuam umte ahung veh jiahun New Testament Baptist Churches Association chu Dumsau khua ah organized hung bawlin ahung dinkheta uhi.
1958 akipan in BMM Missionaryte'n hi kouhtuam naupang taha lamkai diingte Training chu Makunda, Alipur leh Silchar bangah ahung pia jeelva, Hutahah Baptistte thugin leh thusehte zilna a vangkim in ahung neihpih jeel uhi.
New Testament Baptist Churches Association leh a nasepte
NTBCA a kilawikhawm local kouhtuamte in 1958 kuma kipanin local kouhtuama lamkaitu diingte kizilsahna (training) theihtawp suahin ana bawlpanta uhi. I kilawikhawmnava houtute in a vangkimin Evangelist-te, Pastorte, Dikonte leh Khanglai lamkaite kizilsahna hun abawl jeel uhi. Hih anuaia lamkai masate adiahkholin Rev. H. Thangliankham,Rev. B. Nengzachin, Rev. H. Khaizatong leh Rev. H. Hangzakam te lamkaihna nuaiah Bible daan dungzuitaha kithuhilhna dettah ana kineita hi. Hubaanah, Bible camp bang, short term Bible school bang, evangelistic weeks kichite bang jong NTBCA lamkaite'n avangkimin memberte a diingin akibawl jeel hi. Huchiin Lalpa'n lamkaitu diing khangthah Rev. H.C. Stephen bang ahung na pia in amah lamkaihna nuaiah tu in Simte sung leh apua-ah adiahkholin Manipur simlama umte kawm tanpha ahung baanphasahta hi. Hitobang lamkaitu kipezoutah leh feltah mei jaalin i kilawikhawmna un etdaan thah leh kinepna thah hung pia in, khantouhna nasatah mei ahung tunta hi. Lalpa'n a suahte nasepna nasatah meia hung vangpiah in tuni chiangah local kouhtuam 60 veel bang toh kilawikhawm theiin NTBCA chu ahung keehlianta hi. Tu in Pastor 30 bang, Evangelist 7 bang, Missionary leh kouhtuam phutdohtu 21 bang ahung pia hi. Hubaanah Bible College a lecturer 7 (sagih) lainatna leh hehpihna toh naseem 7 (sagih) leh ahung panpihpihtu diing mi Staff 15 (sawmlenga) bang ahung pia hi.
Mission
NTBCA kouhtuamte'n jong thupiah lianpeen chu ngaihkhawh peena nei in India gamsung leh pua ah, adiahkholin a innveng Nepal leh Myanmar tanpha ah tanchinpha thehdalhna leh Mission nasepna ah theihtawpin pan ana kilatou jeel hi. NTBCA a kilawikhawm kouhtuamte'n Tripura, Assam, Arunachal Pradesh, Manipur, Orissa, leh tu in Nepal leh Myanmar tanpha ah Missionary naseem diing mi ana kisawlta hi. Local kouhtuam 3 (thum) bang Nepal ah phuhkhiah in aumta a; Tripura a 2 (Nih) Manipur ah 3 (Thum) leh Orissa ah 1 (khat) ana kiphutdohta hi.
Christian Literature
Lehkhajeemte manga tanchinpha nasepna leh haamletkhiahna leh sutdohna lamah NTBCA kouhtuamte'n jong theihtawp suahin pan akilatou jeel hi. Thuhun thah leh Psalm lehkhabu Simte haamin 1975 kumin sutdohin ana uma, huleh Bible pumpi chu 1993 kumin Trinitarian Bible Society panlaahna toh hondohin ana umta hi. Hulouah Thuhun thah Psalm leh Thupil telin tunung sawtlouah honkhiahin aumpah diing hi. NTBCA in tuni tanchiangah Simte haamin lehkhabu 45 bang sutkhiahin ana umta a; hute lahah lehkhabu 20 veelte chu Bible a Commentarite leh Bible a lehkhabu umte ahi. Huchilou adangte chu Pathian phatna labu bang, mimal tanchin kisuahna bang leh thugin toh kisaite bang leh adangdangte ahi uhi. Hulouah Hachina thusuah khat "Hinna Thah" (New Life) kichi ana kineia, hikhu in jong hachina thusuah simtute diinga khantouhna leh siampichingna lamah panmun poimohtah aluahtou jing hi.
Siamzilna (Education)
NTBCA in Asian Baptist Bible College and Seminary (ABBC & S) chi in Bible College khat ana kidinkhia a, hutah ah Bachelor of Theology (B.Th) leh Bachelor of Religious Education (B.R.E) degree ziltheihna leh ngahtheihna Bible Hill, Rengkai Churachandpur - Manipur munah ana kibawlkhia hi. Hulouah mahni haam ngeia ziltheihna diing ngimna in Thadou-Kuki haama Bible zil nuamte diingin Indo- Myanmar gama Moreh khopi ah Graduate of Theology (G.Th.) leh Certificate of Theology (C.Th) Certificate ngahtheihna diing leh Pathian nasepna diing kot ana kihong hi. NTBCA in Khristian High Schools 3 (thum) leh Primary School 7 (sagih) Manipur gamsung mun tuamtuam ah Khristian khangthah tamtahte siamzilna diing deihna jaalin kot akihong thei nalai hi. Hutah ah Khristiante'n ingaihsang diing uleh ingaihkhawh diinguh kihilhna baanah a vangkima tanchinpha kizilsahna mun poimohtah hita hi.
Lainatna nasepte (Compassionate Ministries)
NTBCA in a etkolna nuaiah tagah gentheite diingin Children Home 3 (thum) ineiva, huchu Baptist Children Home (USA) muna umte toh pangkhawma isepkhawmna uh mun poimohtah ahi a, Kathmandu, Nepal munah Children Home 1 (khat) inei nalai uhi. Hulouah Numei pawlpite panlaahna jaalin Migaite kepna leh Counselling bawlna mun (Pregnancy Care & Counselling) Churachandpur- Manipur ah munkhat akinei hi.
Thukhaahna (Conclusion)
NTBCA tanchin i nunget kiit tah chiangin Pathian ginumna leh hehpihna lamchintengah muhtheihin aum hi. I hinkhuavah ama'n nasatahin ahung vangpiah hi. Huziahin Pathian silbangkim bawlthei phatin kipaahthu i soiva, huleh loupina leh zahumna Amah ipia uhi. Lalpa'n loupina tangta hen. Amen.
