(1483 – 1546 AD)
By ~ S. Pauchinlian
THUMAPUI
Kum 1520 nipi laiin lehkha hoihtah a seal a kinam khat Germany gamsung pumpi ah mi thumanglou khat matdoh theihna diing in hawmzaah in a um hi. A lehkha “O Lalpa, thou inla,” chiin a kipan a “Huleh hi thutanna bawl in. Na Grephuan ah Ngal a luut hi,” chih ahi hi.
Hi official letter (papal bull) Martin Luther – Ngal (wild boar) kawm a tungna diing in ha thum a luut hi. Hi lehkha Wittenberg a Luther oija a pangna a tungma in, a sung a thu umte Luther in a thei zouta hi. Lehkhathon ah Martin Luther thugin 41 chu “thuhilh dihlou, mi puise thei, bil a zong jaahnuam huailou leh ngaihtuahna mawlte puisetu leh Catholic thuhilh toh kituahlou” chiin a mohpaih uhi. Huleh hi lehkha in Luther kisiih diing leh a thuhilh dihloute zuutkiih diing in ngeen a, a bawl uutlouh leh a tungah thutanna tung bang bang a thuaah diing a chi hi.
Luther in lehkhathot chu October 10th in a mu hi. Huchiin hehpihna hun ni 60 bei kuan in, ama’n a naupangte Wittenberg polam ah puiin, Canon Law[1] leh nidanglai a theologian te lehkha tampi a haaltum uhi. Huchiin tomkhat a kingaihtuah zoh in Luther in amah mohpaihtu lehkha zong a haal hi. Hichu amah dawnna ahi. Bangchidan in e i chihleh, “Amauh in kei lehkhabu a haal jiah un, ken zong amahuh a ka haal diing” a chi hi. Huleh hih December 1520 a meikuang in a etsah ahihleh German gamsung pumpi a Pope thumanglouhna leh deihlouhna suhlatna a ensah hi. Huchiin, Pope leh Roman Catholic te’n Protestantte subuai nawnlou in, huleh Lutheran te’n zong Catholicte lehkha a haal nawn sihva, himahleh tumlam gama Khristian kouhtuam chu kikhen in aum den hi. Tuhun a Catholic leh Protestantte ki khenna ahihleh Luther hunlai a hung kipan, huleh hichu kouhtuam khangthu ah kiheng limdangna (Reformation) hun chiin a ki chi hi (1517-1648).
LUTHER PIANTHAHNA
Kum 1483 a piang Copper toudoh pa tapa Luther in a let chiang in Lawyer hih diing apa deihna bang in a tum tinten hi. Huchiin kum 1505 nikhat Stotternheim khua lampi ah a pailai in huihpi nung in vaanging kawlphe leh keeh akia hi. Huchiin Vaan apat keeh hungkia in agei sepkha a, Luther in lau talua in tualah a bohkhup hi. Huin ama’n “St. Anne, hung panpih in! na hung panpih leh monk in ka luut diing hi” chiin a haamtei hi. Huchiin Luther in a kichiamna tu tinten in, Anu leh apa phallouh hinapi in, kaalnih zoh in a kichiamna taang tung na diing in Ertfurt a um Augustinean monastery ah monk diing in valuut hi. Kum bangzah aha khat nung in Luther in Monastery a aum lai tanchin hichiin a gen hi. “Monastery daan khauhtah in ka zui tinten a, huleh daan zuih ziah a vaangam luut diing hileh kei ka hi diing hi. Monk in um sawt leng kei leh kei zong ka haamteina, ka lehkhasimna leh nadang katohte ziah in ka si diing hi,” a chi hi. Luther in a tahsa nasatah in a sawi hi. Khatvei vei nithum sung ann ngawl in huleh phalbi vot nuaiah puanlum silh lou in ihmu zel hi. Huchia mahni a kisoisat vaang in moh kisahna in dimden a huleh Pathian thupina genzoh guallouh ahihdan zong a gel zing hi. Kikhopna ah “Lalpa nitaah ann” a bawl masat in hichiin a chi hi, “nasatah in ka lau hi. Ka kingaihtuah a, ‘kei koi kahi a, bangziah a ken ka khut leh ka mit Lalpa maiah ka domsang thei diing a hiai? Ajiah ahihleh kei leivui leh vutvai a kibawl sualna dim ka hi a, huleh Pathian chu a hingzing, kumtuang aum zing leh dihtat ahingaal a.” Luther sual lungngaihna leh sualna a pumdim chu mahni ki sawina tampi, hetuliante hehneemna leh hamuannate in zong a lakhethei sih hi. A sual phuang na siampu (Confessor) pa in Luther kawm ah, Pathian lungsiat in chiin ahilh a, himahleh Luther in ni-khat zaning leh lungthah in, “Pathian ka lungsiat sih, ka mudah hi” chiin khauhtah in a dawng hi. Monk sual a buaina neipa in, lungsiatna a hawl zing chu Pathian thu simna tungtawn in ahung muta hi. Wittenberg University ah Bible zilna lamtoh kisai mohpuahna piah a aum in, Jesu kross dawn a thugente lungluut tahin a hung ngaihtuah hi, “Ka Pathian, Ka Pathian, bang diinga hung taisan nahiai?” Khrist kitaisan! Bang diinga Jesu Khrist kitaisan diing a hiai? Luther in amah kitaisan thei ahi chiin kingaihtuah hi. Bangziah in ahiai i chihleh amah misual ahi a, himahleh Jesu Khrist misual ahi sih. Huleh Khrist kitaisan jiahchu mihingte sualna jiah ahi diing hi. Huleh Jesu’n mihingte sualna apat ahutkhiahna diing ziah in Pathian taisanna apom a hiai? hih dotnate chu guntah in a ngaihtuah zing hi.
Luther hagau lam tawlnga theiloua aum laiin, a lungsim ah Pathian heetna thah leh kihenglimdangna ahung neipanta hi. Huleh a tawp in kum 1515 in Paul in Romte kawma a lehkhathot a simna ah, “Ajiahchu hikhuh ah Pathian dihtatna chu ginna apat ginna in suhlat in aumta hi; ‘Midihtat chu ginna in a hing diing’ chih gelh bang in, Romte 1:17.” Hi Bible chaang ah ama’n a hagau hutdamna diing poimohtah a hung mukhia hi. Luther in hichiin a gen hi, “Pathian dihtatna leh “midihtat chu ginna in a hing diing” chih kizopna bang ahiai chih ka theihsiam mateng suun leh zaan in ka kingaihtuah den hi,” a chi hi. Pathian dihtatna chu hehpihna ziah a hung kipia dihtatna ahi a, huleh Pathian khotuahna siangthou chu Jesu Khrist ginna ziahin i tang uhi chiin ahung theisiamta hi. Huzoh in piangthah ka hita chih ka hung theichian a huleh Paradise kot kei diing a hongsah ahita chih ka thei hi.
Khrist kithoihna ginna ziah chouh a mihingte hutdam ahihdan chiangtah in ka mu hi, Luther in a chi hi. Kross chouh in mihingte sualna a lamang thei a, huleh dawimangpa silbawltheihna apat in ahung hundam thei hi. Hunung in Luther thugin minthang mahmah “ginna ziah chouh a siamtansah” (Justification by faith alone) chih ahung umdohta hi. Ama’n Catholic thugin ginna leh silhoih bawl ziah a siamtansahna thuhilh toh hoihtah a kikalh ahi chih a thei hi; huchu ginna suhlatna diing in silhoihbawl, kouhtuam thuginte pom, huleh kouhtuam in a bawlzing te zuih diing ahi. Luther in Khrist siamtangsahna amuh apat in siltampi a hung bawldoh hi. Huleh hutdamna peen Khrist gingtaatna ziah chouh a muh ahihziah in, siampute ngetsahna chu a poimoh sih hi. Ginna chu Pathian thu heetna ziaha hung um ahi a, huleh a kigial simziah leh thugen ziah bang in zong a heet theih hi a chi hi. Ahiin monks te, mipite huleh misiangthoute a poimoh sese sih hi. Huleh hih a thugen teng ziah in Roman koutuam thuhilh chu bangma lou suah in huleh koutuam awl awl in ahung puuhsia hi.
LUTHER IN PAPAL THUNEIHNA A DEMNA
Luther in Hagau lam a amuhsuah in bangtan a tut diai chih ahe malawh sih hi. Kouhtuam sum le pai thu ah dihtatlouhnate ziah in Germany ah sahkhua lam helna ahung haat a, huleh Papal thuneihna dinmun zong siamthah diing in ahung um hi. Huleh Roman kouhtuam in Khristian gaaldou a kuante (Crusaders) diing a ‘vaangam ticket’ a zuah uh chu sum muhna hoihtah ahi. Hih vaangam ticket zuaah toh a silhoih bawlte ziah uh, ahihlouhleh munsiangthou a paite chu kouhtuam in mahni ki-soisahna (penance) tuahlou a natoh hoih in simsah uhi. Huleh Khrist kross a sihna ziaha siamtansahna zong misiangthoute silhoih bawlte in a muthei diing uh a chi uhi. Thugentute’n thanuamtah in vaangam ticket a zuah va, bawltheitah in mite a houlimpih uhi. Huleh hih a silthohdohte un a thohtu hagau bangchibang a sual hizongleh vaangam kai teitei diing ahi chiin mite kawm ah a gen uhi. Sual lungngaihna peen ngaihtuah khaahlouh leh hoihtaha gelphaah ahi nawn sih hi. Hitobang thuhilh in Luther nasatah in a sulunggim mahmah hi. Luther in a muhchian ‘ginna ziaha siamtangsahna’ toh kithuam in a thugenna teng ah, vaangam ticket kizuaah chu a gensia hi. Huleh hih a lungkimlouhna peen kum 1517 in sousang diah hi. Bangziah in ahiai i chihleh Dominican lamkai thugentu John Tetzel in Germany pumpi a Roman Kouhtuam lamkaite luang in, Rome a um St. Peter Basilica lamna diing in vaangam ticket zuah in sum a dongkhawm hi. Huleh Tetzel in kiliansahtah in sum thoh unla vaangam ticket lei leuhchin, misi sate zong purgatory apat a hagau uh ladoh a vaangam luut diing uhi. “Sum dongkhawmna sung a sum a khiat ging tahchiang in, purgatory a hagau umte kipaahin vaangam ah tomluut diing uhi,” a chi hi.
Luther a diing in Tetzel thugen chu thuhilh dihlou leh pomtheih himhim louh khat ahi. Huleh ama’n Roman thuhilh Bible toh kituaahlou a sahte 95 chu lamkaite kinialna aneihpih theihna diing in, October 31st, 1517 in University ngeina daan in Wittenberg a um Castle Church kot ah ataah hi. A kinialna vah ama’n ‘vaangam ticket in sualna a lamang theisih a, huleh purgatory apat in zong hagau a hundoh theisih hi. Huleh hi thuhilh chu dihloutah ahihbanah sum thohtute diing a kinepna dihlou leh muangna lauhuai ahizaw hi, a chi hi.’ Huleh hikhuh in kihenglimdangna nasatah in ahung pawdoh hi. Hunung hun sawtlou in, German Dominicante’n Martin Luther chu Rome kouhtuam heutute kawm ah “thuhilh dihlou leh thugin lauhuai” hilh ahi chiin a mohpaih uhi. Huleh Vatican a Pathian thusimte in zong, vaangam ticket kizuah gensete chu thuhilh dihlou hilh ahi chia gensia in, Luther thugin nialkalhna diing in lehkha tampi a gial uhi. Rome a thukhenna tawpna diing ah Luther in Pathian lehkhabu Siangthou apat in ka thuhilh dihlouhna hung hilh un a chi a, huleh Purgatory tan a Papal te thuneihna zong a dong hi. Kum 1519 a ni 18 sung kinialna aum zoh in, Leipzig aum John Eck toh a kinial laiun Luther in, “thuneitu in a chaang chiang in bawlkhial theimah hi. Ahiin kouhtuam leh Pope te’n hutdamna diing in bangma a bawlthei sih uhi. Himahleh hutdamna chu Pathian thu apat ahung um diing ahi.” Huleh Luther thutanna masapen ahihleh – hutdamna chu Khrist ginna chouh ah ahi, anihna ah – Khristian ginna leh umdaan diing chu Pathian Lehkhabu Siangthou apat ahih diing ahi. Pope te ahihlouhleh vaihawmtute thuhilh pomna ziah in ahi thei sih hi. Huleh Leipzig a kinialna a neihzoh un, John Eck in Rome ah chiah in Luther thuhilhtu dihlou ahi chiin ava phuang hi. Huchiin Luther in German mipite theih diing in lehkha neu in a thuhilh leh Roman Catholic dihlouhnate a hawmzaah hi. Ama’n vaihawmtute (miliante) a lehkhathot na ah, lengte in kouhtuam sung a – bishopte neih leh gou dihloutah a a lamdohte uh laahsah a, hubanah German gamsung kouhtuam khat siamdoh diing in ngeen hi.
Luther lehkhagelh “The Babylonian Captivity of the Church” ah ginna ziaha siamtansahna in bangchituh a kouhtuam thugin siampha ahihdan agen hi. Roman thugousiah bawlte ah Khristiante saltaang ahiuh chiin zong a gen a, hubanah Pope thuneihna a dem hi. Ajiah ahihleh Pope in siampu ngetsahna tellouleh amah thugousiah zuilou a Khristian mimal jaleenna a Pathian zot diing a phallouh ziah in. Adihtah in thugousiah chu Khrist phutdoh diing ahi a huleh Khristian te chouh zuih diing ahi. Hi tehna dungzuiin Luther in Roman thugousiah ngate (5) siamtangna diing amu himhim sih hi. Ama’n thugousiah nihchouh; Lalpa nitaah ann leh baptisma a pom a, huzong Khristian piangthahte a diing ahi a, huleh siampu khenkhatte a diing chouh ahi biih sih a chi hi.
THUHILH DIHLOU, DAAN PALSIA LEH PASAL HANGSAN
Kum 1520 June in Pope Leo X in Martin Luther chu mohpaihna lehkha suahkhum in huleh ni 60 sung a thuhilh dihlou apat kisiihna diing hun a pia hi. Wittenberg a Luther lehkha haal in a tup a suchian hi, huchu amah kouhtuam apat nohdoh a hingaal hi. A kum kiit January in Pope in Luther chu thugin dihlou hilhtu chiin a phuanga huleh “Roman Catholic Kouhtuam” apat in a nohsuah ta hi. Hulaiin Germany buaina chu leng naupangtah Charles V khut ah a um ta a, amah chu kouhtuam gum diing leh a vaihawmna gamsung a thugin dihlou heemkhe diing a kichiamna nei sa ahi hi. Huzoh in ama’n Worms a kikhop khawmna ah a lehkhagelhte hilhchian diing in Luther a kou hi. Mi paikhawmte maiah Luther in ama a gen mahbang in, Bible toh kituaha thuhilhna chouh in amah lungsim hengthei diing hi a chi hi. Ama’n thukhentute kawm ah “ka sialepha heetna chu Pathian thu chouh ah a koltaang hi, bangma ka zuutkiih sih diing, ajiahchu ka sialepha heetna kalh a gamtatpen adih sih a, bit zong a bit sih hi. Pathian hung panpih in. Amen,”a chi hi.
Kumpi Charles V in Luther lehkhagelh pomtheilou in hichiin a chi hi, “Dawimangpa (devil) Monk a kisiam in ni danglai dihlouhnate mun namsetah khat ah khawlkhom in, huleh thudih thah bang in hung pawdoh hi.” Huchiin Luther in thutanna a tuaahma a bittah a Saxony tan apaitung theihna diing in ni 21 a nei hi. Ahiin thutanna a tuaahkha sih hi. Luther chu mat leh sihna a tuahma in a lawipa Saxony lengpa Duke Frederick in a veengbit hi. Frederick vaihawmna chu Wittenberg zong ahipha hi. Lengpa in Luther chu Wartburg kulhpi ah bittah in um sah a, huleh Junker George kichi milian khat min bawltawm in kumkhat phial a um hi. Huleh hihun sung in ama’n Thuhun Thah German haam in letdoh a, hichu Germany ah mimal leh mipi biahna lama khangtouhna lianpi a hung hita hi. Huzoh in Roman kouhtuam deihlouh ziaha kiphinna nasatah in ahung umdoh hi. Khopi tuamtuam ah siampute leh vaihawmtute in biahinn apat milim a tungte ladoh in huleh kouhtuam mipite nusia uhi. Kihenglimdangna deih mithahte chu Luther sang in zong a khauh pai zaw uhi. Huleh gamsung a milian tuamtuam te in Luther mohpaihna chu nasatah in apomthei sih va, hih kihenglimdangna delhtute a panpih uhi.
Kum 1522 in Luther chu hagaulam puahthah diing in Wittenberg ah a kiihkiit a huchu Germany te diing in ettontaah ahi hi. Ama’n bishop te natohna chu a khawlsah hi, bangziah in ahiai i chihleh Bible ah a kimuhlouh ziah in. Huleh ama’n a genna ah mipite’n pastor poimoh in milian milal (not dignitaries) poimohlou hi a chi hi. Saxony gamsung leh a kiim a thunatongtute in zi leh pasal neihlouh diing (Celibacy) chih a lakhia uhi. Huleh nidang a Roman Catholic thuhilh ana zuih laiva father leh sister te in zong zi leh pasal hung neita uhi. Huchiin Luther ngeiin zong a zi diing in sister a pang Katherine Von Bora a kiteengpih hi. Tumlam khristiante lahah thunatongte diing in thilhthah a hung um hi; huchu bang ahiai i chihleh pastorte zong zi neithei in huleh a innkuante toh a khosa khawm thei uhi. Huchiin Luther in Latin biahna paidan enthah in huleh German haam in a letdoh hi. Huleh “Lalpa nitaah an” Catholic te bawldan peen zong a deih sih hi. Amah hun ma a kum 100 paita a John Huss thuhilhna bang in, gingtu paikhawmte in sang leh uain a tang uhi. Huleh biahna tup zousiah chu henglimdang veh ahi; hichu Lalpa nitaah an neehna leh Pathian thugen leh thuhilhte bang ahi.
Kihenglimdangna a um vaang in Germany ah bangkim a paihoih tuan sih hi. Kum 1524 in Luther in kumpite kithuahpihna a muhtheih na diing a bangtan a kituhluut ngai ahiai chih a sulang hi. Huleh Germany a loubawl mite’n Khristian hinkhua ah jaleenna apoimoh bang a neehlehtaah hawlna lamah zong jaleenna poimoh chiin a pute (lords) apat jaleenna a delh uhi. Huleh loubawl mite’n milian mi lalte kawm ah phuutna 12 a bawl va, huleh tanchinpha in a phalsah ahihlouh leh a pute thuneihna laahdoh diing in zong a gen va, huleh a pute apat a sep diing tamtah a phuutte uh zong laahdoh sah diing in a ngen uhi. Huchiin Luther in loubawl mite kiphinna chu a ngaihkhiat sah a, ahihvang in loubawl mite’n a kiphinna uh lohching na diing in hiamngamna ahung zattah un-Luther ngaihdan ahi nawn ta sih hi. Huleh Luther in lengte kawm a lehkha a gelhna ah, hih gilou leh mithat lungput nei loubawl mite chu, “a sia, ahoih lou, adihlou leh Setanic lungsim ahi chih ngaihtuah lou in sawn puuh unla, kheen unla that un” chiin a gelh hi.
Kum 1525 in Lengte leh milian milalte’n hi Loubawl mite kiphinna ah loubawl mite chu mi 100,000 vel a that uhi. Huleh hih kiphinna a damsun loubawl mite’n Luther chu Thuhilh dihlou hilhtu ahi chiin a koih uhi. Huleh Loubawl mi tampiin Roman Kouhtuam a ki nung piahlut kiit va, huleh a dang chu kihenglimdangna khauhzaw sem in a pang kiit uhi. Luther pomdan in hagaulam ah Pathian maiah kibang veh i hiva, ahihvang in leitung ah chu i dinmun uh a tuamchiat hi achi hi.” A tomlam a gen diing in Martin Luther peen mi hoihbukim ahi sih hi. Abul in kihenglimdang hung tun tu Copper miner pa tapa ahung hi a, huleh aman a hinkhua pumpi ah Pathian a biaah diing chih ahung ki chiam ta hi. Ki henglimdangna tum miten kouhtuam chouh a heng zou va, ahihvang in hih Monk lungthah khat kiphinna leh Wittenburg Bulletin board a vaangam ticket kijuaahna te mi maiah a dihlouhna ahung hilhtah chiang in kihenglimdangna dihtah ahung um thei hi. Martin Luther in khiin zoh guallouh, suhsiat guallouh kouhtuam kivaipuaahna ahung heng limdang hi. Huleh amah thuhilhte tutan in theihleh zat ahi zing hi.
DOTNA:
- Martin Luther bangziah a Augustinean Monastery a luut ahiai?
- Luther in Pathian dihtatna (siamtansahna) a muhtheihna diing in bang a bawl ei?
- Luther piangthah zoh a a sepdohte gen in?
- Luther hangsan nasahnate gen in?
- Martin Luther in kihenglimdangna ana panlou hileh kouhtuam dinmun bangchiin um diing in na gingta ei?
[1] Canon Law kichi ahihleh Catholic kouhtuam kipuahdan leh vaihawmnate lehkha ahi.
Go to Top Page
