"Hizongleh gam hoihzaw deih ana hi va, huchu vaangam ahi. Huchihjiahin Pathian chu a Pathian uh chiha kouh a zum sih hi, ajiahchu amahuh diing in khopi khat guatsa in a koihta hi," Hebraite 11:16.
Tuni a i thupi pansan diing a, i changtel na bung (Heb. 11) chu Bible ah ginna mihangsan te tanchin kigelhna mun ahi. Hih ginna mihangsan te' Pathian in a silchiam te mu manlou in a si uhi. A damsung hun un Pathian silchiamte musih mahleh uh, gam hoih zaw leh nuam zaw gam kinem ahiva, hujiahin a kinepna/ginna uh sihtan in a tudet zing uhi.
Hih ginna mihangsan te zong nang leh kei bang a mihing ahiva, huleh khovel dang a teng hilou in hi khovel mah a ei piangma a ana hing ahi uhi. Pathian thuchiam a bukim in nei sih mahleh uh, Pathian in a chiamte tang diing in, khovel nopsahna zousiah taisan in Pathian a diing in gam hoihzaw kinem in a kisusiangthou zaw uhi. Tu hun in Pathian in Amah gingtate a diinga Achiam Bible ah amuhtheih hi. Pathian in Khrist sisan a atatsa te umna diinga a siam, vaan thah leh lei thah tung utlou mi um diing in ka gingta sih hi (Thuph. 21-22). Sawlleh John in huchu meng (vision) in ana mulawh hi, "Huleh vaan apat aw ngaihtah khat in, "Ngai in, Pathian teenna chu mihingte lah ahita, huleh Amah chu a lahvah a teeng diing a, huleh amahuh chu a mite ahi diing uhi. Pathian ngeei chu a kawm vah a um diing a, a Pathian uh ahi diing hi. Huleh Pathian in a mit vapat mittui zousiah asiaahsiangsah diing hi. Huleh sihna, lusuunna, leh kahna a um nawn sih diing hi. Hu ah natna a um nawn sih diing hi, ajiahchu sil masate teng apaimangta hi," a chih ka ja hi, (Thuphuandoh 21:3-4).
Hih Vaan khopi nopdan diing mulaw in, ginna mihangsan te leh sawllehte in zong hahsatna, simmohna leh bawlgentheihna tampi thuaah in ana um uh a, tuniin nang leh kei a diing in etton theih in a um zing uhi. Paul in hichiin a chi hi, "Ajiahchu tulaia thuahgimnate chu ijawchianga eiuh a loupina suhlat a um diing toh tehkaah tham in ka ngai sih hi. Ajiahchu silsiam zousiah in kineem mahmah in Pathian tate kilatna diing angaahlah mahmah uhi, Romte 8:18-19. Hubanah 2 KORINTHTE 4:16-18 ah Paul in tunung a kipaahman muh diing muchiang mahmah in, hikhovel a gimthuahna te bangmalou ahihdan hichiin a gen hi, "Huchihjiahin ka chau sih uhi; ka polam mihing uh kiam hiaihiai zongleh, ka sunglam mihing uh chu ni chin a siamthahin a um zing hi. Ajiahchu mitphetkaal sung chauh ka gimthuaahna uh jaangtakhat in kumtuang loupina gih tungtuang zaw a hung bawlsah zing hi. Sil muhtheihte enlouin, hizongleh sil muhtheihlouhte ka enjaw uhi. Ajiahchu sil muhtheihte chu tomtakhat sunga diing ahi a, hizongleh sil muhtheihlouhte chu kumtuang a diing ahizaw hi." Sih nung kinepna hoihtah nei a, hicha Khrist min a gimthuahna te bangmalou a Paul in akoihna ah, nang leh kei di'n chouna hoihtah a hung pia hi.
Paul in tunung a vaangam a atang/muh diing atheichianga, huchiin agimpih in a sihpih hial hi. Tuni hun in unau, nang leh ken zong vaangam piangthah taten zaalzou diing teng, umlouhna mun hi khovel ah kineem in i hawlden uh hi. Mihing ten i lunggulh uhleh hawlzing uh chu; nat leh sat thualou keei diing, nuamsatah a lungkhamna, dahna, kahna, lunggimna himhim umlou diing. Huleh sum le pai hauh diing, deihdeih nei a, duhduh ne zou a, damtheih diing, huleh i sih hun chianga zong nuamsatah sih khiat diing, huleh vaangam kai diing chih ahi. Aw mihing hia atung a igen teng umlouhna mun zawt theihna lampi Pathian in Jesu Khrist ah ahung siamsah zouta a, a lampi tuan a pai utlou a bangtan um diing na hiai? Ginna a mihangsan te bang a i zot na gam muchiang in hilei, hi khovel silte zousiah nusia a, Paul bang in silmuhtheihlouh sil kumtuang a um diing te ngaihsah in i buaizaw diing uhi. Unau, Pathian deihna bang in meilum kai bang hinkhua i neih chu ahung Siampa deihdan in i zang diing uhi. Gam hoih zaw leh nuam zaw zuan a niteng a, kalsuan zing i hihna ah, i zot khopi i tung na diai? mahni ki etchian apoimoh hi. Niteng, hunteng a na hawlzing leh lunggulh zing hi khovel ah na mu sih diing hi. Aum louhna mun ah hawllou a, aumna mun vaangam chu kinem pum in, mitsuan zing kawma, thanuamtah a hinkhua zang zing diing in panthah, thathah la chiat ni.
