PATHIAN POMTAAH BIAHNA ~ S. PAUCHINLIAN
Amasa in kum 2020 Covid-19 hiileng lah a pat a kum 2021 hung puitung Pathian min in chibai ka hung buh masa hi. Tuni hun in, i Hinna Thah uh deihthoh huaitah tungtawn in Pathian pomtaah biaahna chih thupi a zang in, saulou houlim lei chih uthuai kasa hi. A taangpi in ei Khristian te in kaalkhat in mipi biahna khatvei tei a kinei hi. Manipur Churachandpur gam a teeng te in a taangpi in mipi biahna kaalkhat in 5 vei bang a kinei a, khopi lam a umte in ahihleh Pathianni suun kikhop chouh ahi taangpi hi. Awle tuni a i gennop pentah chu kaalkhat in mipi biahna ahihlouhleh Pathian bangzah vei na biaah ei? chih lam sang in, Pathian na biahna pomtaah, Pathian a diing a biahna pomtaah ahi na diai? chih ahipen hi. Bible bu masapen Siamchilbu 4:1-6 sungah biahna nih a kimu a, huh biahna nihte lah a khat chu Pathian pomtaah biahna ahi a, biahna dang khat chu Pathian pomtaah hilou biahna ahi. Abel sillat a biahna chu Pathian a diing in pomtaah ana hi a, himahleh Kaina biahna chu Pathian a diing a pomtaah ana hisih hi. Pathian in Abel biahna a sangzia ahihleh Abel in lungtang siangthou tah leh Pathian biah utna lungtang dihtah a biahna sillat a hung tawi zia ahi, gan sisan ahihzia a hisih hi. Himun a sillat kichi chu Hebrai haam in minchah chih ahi a, Bible lehkhabu dang ah hih Hebrai thumal a kimuh chiang in zong gan sisan a kithoihna genna a hisih hi. Huleh gan sisan ahih diing chih ahi se se sih hi, huleh hihun laiin (Kaina leh Abel hun) sual ngaihdam na diing a gan sisan a poimoh naisih hi (zat a hinaisih hi). Gan sisan a kithoihna chu Mosi hun apat a ki zang pan ahi. Huziah in Abel sillat kipomna chu lungtang chihtahna toh lungluttah leh kipaahtah a bawlzia ahipen diing hi. Tuni a Khristian ngeina dan, paidan ngeina a Sunday teng a biahinn i va zawt na ah, bangziah a Pathian be diing a kuan na hiai? Pathianni a hihziah a biahinn kai? khanglai lamkai, nupawl lamkai leh deacon nahihziah a biahinn kai chih bang i hihleh Kaina sillat bang a Pathian pomtaah biahna hilou diing ahi. Lungtang teng teng, kipaahtah, thanuamtah leh chihtah tah a biahna ahihlouhleh chu Pathianni leh kikhop ni dang dang a mipi biahna, mimal a Pathian biahna i neihte chu Pathian a diing in a kihdahhuai biahna ahizaw diing hi. Hitobang biahna kihdahhuai chu Zawlnei Isai hunlai bang in ana um kha a, tuni hun in zong i biahna te uh zong ahi diing hi. Pathian in zawlnei Isai hun lai a biahna chu nasatah in a dem ahi, na gan thau kithoihna te uh, ka kihdah hi, ka kham gawp hi, koi in ka biahinn huangsung tuan diing in a hung phuut ei a chi hi (Isai 1:10-17). “Aw nanguh, Sodom vaihawmtute, Lalpa thu ngaikhia unla; nanguh Gommorrah mipite, i Pathian daan ah bil dohun. Lalpa'n, Na kithoihna joujaaite uh kei adiingin bang phatuam ahiai? Belaamtal haalmang sillatte leh gan vaahthaute thau ka khamta a; huleh bawngtalte sisan, ahihlouhleh balaamnoute, leh keeltalte sisan ah ka thangpha sih. Ka ma-a kilaan diinga na hung chiangun, ka biaahinn huangsung tuan diingin kuan ahiai hung phuut? Silpiaah bangmahloute hung tawi nawn sih un; gimtuui kei adiingin kihdahhuai ahi; ha thahte, leh khawlnite, khawmpi kouhte haw ka thuaahlah gawp ta a; kikhopna loupitahte mah jong, thulimlouhna ahi. Na ha thahte u'leh na hunbinei kuutte uh ka hua-a; kei adiingin nohphahsah giaap ahia, thuaah ka chimtaah gawp hi. Huleh na khut uh na jaah chiangun jong, ka mit ka hung huumsan diinga: ahi, haamteina tampi bawl jong le'uchin ka hung ngaikhe sih diing: na khutte uh sisanin adimta hi. Kisil unla, kisusiangthou un; ka ma akipatin na silbawl giloute uh koihmang unla; gilou bawl tawpun; Silhoih bawl jil unla; vaihawmna dih hawl unla, nuaisiaha umte panpih unla, pabeite vaihawmsah unla, meithai thu gensah un, achi hi.” Himunah, Pathian lungtang tahtah a belou a, ngeina daan a biah ahih chiang in Pathian in biahna tuamtuam kipete chu a saang sih a, a kihdah zaw ahi chih a heettheih zaw hi. Pathian chu ngeina daan a biahna piaah diing ahisih a, thanuamtah, kipaahtah a Pathian ahihziaha biahna lungput toh chihtahtah a biah diing ahi.
Johan 4:24 ah Pathian pomtaah biahna dihtah bangchiin agen ei? "Pathian chu hagau ahi a, a bemi te in hagau leh thutah a biah diing ahi." Huziah in Pathian be diing a i kuan chiang in lungtang zousiah a biah uutna toh kuan diing ahi, mi khenkhatte in fashion dan bang mei mei, ahihlouhleh polam muhdan, mite maipha hawlna bang in biahna anei va hitobang biahna chu Pathian pomtaah biahna hilou ahi. Buhtah leh buhlem aum mah bang in, biahna dih leh biahna dihlou zong a um ahi. Tuni a na biahna, na Pathian biahna Abel lampi ahi diai? Kaina lampi ahi diaimah? ki ngaihtuah a poimoh mah mah mei hi. Silpiah a biahna, phatna la leh a thusim a biahna leh biahna tuam tuam Pathian kawm a i piaahte, mite muh a bawlhoih i ki sah zing laia Pathian in i biahna a hung pomsah louh diing a lau huai mah mah hi. Mathai 7:21-23 ah vaihawmni chiang a piangthah dihtah hilou thunatong leh gingtute umdan diing i mu hi. Humite’n hichiin a gen uhi, Lalpa na min in doite kanohdawh a chiin anasep uh kineppih mahmah va, himahleh Pathian a diing a pomtaah hilou nasep a na hizaw hi. A natoh a kinga ahi sih a, Jesu Khrist a piangthahna dihtah neilou ahihziah un ahizaw hi. Humah bang in Pathian pomtaah biahna a hihtheihna diing in piangthah dihtah i hih masat a poimoh a huleh i biahna toh kisai ah; a ziah adih a poimoh hi. Pathian pomtaah biahna, ki thoihna hing chu apoimoh zing hi (Rom.12:1-2).
Go to Top/node/28
